Пасля звальнення з вільнюскай транспартнай кампаніі Андрэй Павук знайшоў сабе новае месца. Калі дакладней — вярнуўся на старое. Пра гэта ён расказаў «Люстэрку».
Цяпер Андрэй Павук не толькі супрацоўнічае з тэлеканалам «Белсат», але і працаўладкаваўся ў Вільнюсе дворнікам — гэтым жа блогер займаўся да таго, як пайшоў кіраваць тралейбусам.
— Часам бывае, што ў «Белсата» ёсць праблемы з аплатай. І трэба, каб была падстрахоўка. Літоўскай я не ведаю, нічога рабіць не ўмею больш. На будоўлі працаваць не люблю, там цяжка. Што яшчэ застаецца? Дворнік, — патлумачыў ён свой выбар.
Дворнікам Павук уладкаваўся праз пару тыдняў пасля звальнення з транспартнай кампаніі, у сярэдзіне лістапада 2025 года. На новым старым месцы яму падабаецца, кажа ён.
— Працую колькі хачу. Першую палову дня папрацаваў, стаміўся, прамок — пайшоў. Я магу не ператамляцца. Калі снег кідаць лапатай, становіцца цёпла, даводзіцца нават расшпільвацца. Астэахандроз не прагрэсуе. Гэта як схадзіць у спартзалу, толькі там трэба грошы плаціць, а тут робіш сацыяльна карысную працу на свежым паветры, і табе яшчэ за гэта плацяць, — разважае ён.
Цяпер блогер атрымлівае 700 еўра за месяц і шукаць новую працу не плануе.
— Пакуль не выганяць, буду заставацца, — рэзюмуе Андрэй Павук.
Нагадаем, прычынай скандалу стала тое, што Павук адмовіўся размаўляць па-літоўску з дыспетчаркай тралейбуснага парку, а запіс інцыдэнту апублікаваў у сацсетках. Пасля ён сцвярджаў, што папрасіў прабачэння ў жанчыны і кіраўніцтва, але падкрэсліў, што яе абавязак — дапамагаць кіроўцам, а не вучыць іх мове.
На сітуацыю адрэагаваў мэр Вільнюса Валдас Бянкунскас. Ён назваў учынак Павука «абсалютна непрымальным» і падкрэсліў, што такім чынам беларус праявіў непавагу да літоўскай мовы і супрацоўнікаў вільнюскага грамадскага транспарту (Vilniaus viešasis transportas, VVT).
У лістападзе 2025 года Павука звольнілі. У загадзе гендырэктара вільнюскай транспартнай кампаніі Ігнаса Дэгу пра скасаванне працоўнай дамовы было сказана, што той «4 кастрычніка 2025 года дапусціў грубае парушэнне працоўных абавязкаў».
У беларуса ёсць від на жыхарства ў Літве, і Дэпартамент міграцыі краіны тады заявіў, што пакуль не збіраецца пазбаўляць яго гэтага права, піша Delfi.
«Незразумела, які закон парушыў гэты чалавек, Дэпартамент міграцыі плануе звярнуцца ў паліцыю, папросіць пра ацэнку і высновы», — паведаміла кіраўніца ведамства Эвеліна Гудзінскайце.
Чытайце таксама
Поблагодарить за статью